ဘဲ အအေးမိ၊ နှာရည်ယို၊ ချောင်းဆိုးရောဂါကို ကာကွယ်ကုသနည်း

ဘဲမွေးမြူသူများအနေဖြင့် မိုးရာသီကာလတွင် ဘဲများ၌ အဖြစ်များသော အအေးမိ၊ နှာရည် ယို၊ ချောင်းဆိုးရောဂါအကြောင်းကို သိရှိထားရန် လိုသဖြင့် ကာကွယ်ကုသနည်းကို ဖော်ပြပေးလိုက်ပါသည်။

ရောဂါဖြစ်ပွားသည့် အကြောင်းအရင်းမှာ -

အေးသောရာသီဥတု (သို့မဟုတ်) ရာသီဥတုရုတ်တရက် ပြောင်းလဲခြင်းမျိုးတွင် ဘဲများ အအေးမိ၊ နှာရည်ယို၊ ချောင်းဆိုးခြင်းများ ဖြစ်တတ်ပါသည်။
အခြားရောဂါများကြောင့်လည်း ဤလက္ခဏာမျိုး ဖြစ်ပေါ်နိုင်ပါသေးသည်။

ရောဂါလက္ခဏာများမှာ -

နှာချေခြင်း ၊
နှာရည်ယို စီးကျခြင်း၊
ခံတွင်းပျက်ခြင်း၊
မျက်လုံးတွင် အရည်လည်နေခြင်း၊
နှုတ်သီးတွင် အစာများကပ်နေခြင်း၊
အမွှေးအတောင်များ တွဲလျားကျနေခြင်းတို့ ဖြစ်ပွားကြပါသည်။

ကူးစက်ပုံ

ဤရောဂါသည် လေ၊ သောက်ရေနှင့် အစာများမှတဆင့် ကူးစက်ပြန့်ပွားနိုင်ပါသည်။

ကာကွယ်ခြင်း

အာဟာရပြည့်ဝသော အစာများကိုကျွေးပါ။
သန့်ရှင်းသောရေကိုသာ တိုက်ပါ။
ဘဲခြံတွင် ဘဲများကို ကြပ်ညပ်စွာ မထားပါနှင့်။
ဘဲခြံနှင့် ခြံဝန်းကျင်ကို သန့်ရှင်းစွာထားပါ။
ဆိုးရွားသောရာသီဥတုဒဏ်ကို ခံနိုင်ရည်ရှိစေရေးအတွက် အကာအကွယ်ရအောင် စီမံထားပါ။
ဘဲများကို ကာကွယ်ဆေးထိုးရန် လိုအပ်ပါက ကြိုတင်ထိုးနှံပေးပါ။
သောက်ရေ ၁ လီတာတိုင်းတွင် နနွင်းမှုန့် လက်ဖက်စားဇွန်း တစ်ဝက်ရောပေးပါ။
ဆင်နှာမောင်းပင် (သို့မဟုတ်)ဂွေးရွက်ပြုတ်ရည်ကို တိုက်ထားပေးပါ။

ကုသခြင်း

ဂျင်း ၁ ကျပ်သားကို ထောင်းပြီး အရည်ညှစ်ယူပါ။ ယင်းကို ရေ ၂၅၀ စီစီတွင် ကြံသကာ ၁ ကျပ်သားနှင့် ရေဖျော်ပါ။ ယင်းနှုန်းအတိုင်းရလာသည့် ဖျော်ရည်ကို ဘဲ ၁၀ ကောင်စာနှုန်းဖြင့် သောက်ရေတွင် ရောတိုက်ပါ။
ပဲနံ့သာစေ့ ၁ ကျပ်သားကို ရေ ၁ လီတာနှင့်ပြုတ်ပြီး ရရှိသော အရည်ကို အအေးခံ၍ တိုက်ပါ။ ထိုအရည်ကို သောက်ရေနှင့် ရောပြီး သောက်သုံးစေပါ။ အရွက်များကိုလည်း အစာနှင့် ရောကျွေးနိုင်ပါသည်။
ဆင်နှာမောင်းရွက်(သို့မဟုတ်)ဂွေးရွက် ၁ ဆကို ရေ ၂ ဆရောပြီး ၅ မိနစ်မှ ၁၀ မိနစ်အထိ ကျိုပါ။ မင်စုတ်ပြွန်(သို့မဟုတ်) အပ်ဖြုတ်ထားသော ပလတ်စတစ်ဆေးထိုးပြွန်ဖြင့် ၁ ရက်လျှင် ၂ ကြိမ်၊ ၃ ကြိမ် တိုက်ပေးပါ။

ဤရောဂါကိုကာကွယ်ရန်နှင့် ကုသရန်အတွက် ဘဲ ၁ ကောင်စီ ကို ကြက်သွန်ဖြူ ၁ မွှာကျနှုန်းဖြင့် နေ့စဥ် အစာနှင့် ရောကျွေးနိုင်ပါသည်။

မှီငြမ်း-မွေးကုဦးစီးဌာနတွင် သင်တန်းတက်ခဲ့စဥ်က သင်တန်းမှတ်စုများ။

ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

Farm Link Co.,Ltd ကြော်ငြာ

🌾စပါးဈေးမကောင်းတဲ့ ရာသီမှာ အမြတ်ကျန်အောင် ဘယ်လိုစိုက်မလဲ⁉️ ❗စပါးဈေးကလည်းမသေချာ၊ သွင်းအားစုစရိတ်တွေကလည်း တက်နေတဲ့ဒီလိုအချိန်မှာ သွင်းအားစုဖိုးကို လျှော့ချပြီး အထွက်နှုန်းကို ထိန်းထားနိုင်မှ ဦးကြီးတို့ အဆင်ပြေမှာနော် ✔️ဒါကြောင့် ကိုယ်သုံးသမျှ ကိုယ့်အတွက်အကျိုးရစေမယ့် အရည်အသွေးစိတ်ချရတဲ့ သွင်းအားစုပစ္စည်းတွေကိုပဲ ရွေးချယ်သုံးသင့်ပါတယ်။